Alte Urkunden des Kirchspiels Herzlake
Meppener Urkundenbuch Nr. 360
1471, März 21.
Hermann Moddeke zu Westrum verpflichtet sich für ein ihm gegebenes Darlehn zu dem von der Bauerschaft Westrum an die Kirche in Herzlake zu zahlenden Wachszins von 2 Schillingen und 4 Pf. Die Bauern. von Herzlake lösen ihren Wachszins ab durch Uebergabe von vier Scheffelsat Land im Herzlaker Esch an die Kirche.
Original: Pfarrarchiv zu Herzlake.
Ick Johann Merswin, in der tyd eyn zworen richter to Haselunne van bevele des hochgebornen forsten myns leven genedigen heren, heren Hinrikes van Zwarseborch , van Godes genaden byscopp to Monster und administrator der hilgen kercken to Bremen, enkenne unde betuge apenbare vor allen luden in dessen apenen besegelden breve, dat vor my ys gekamen in eyn heghet gerichte, dar ick stede und stol des gerichtes beseten hadde, als ick von rechte scolde, myt mynen kornoten hir nabescreven , Moddeken Hermen to Westrum unde enkande, dat he vor syk unde al syne erven myt wyllen unde vulbort al syner erven hadde vorkofft und vorkoffte eynes rechten steden vasten erffliken ewigen kopes unde in eyne rechten brukene upborne besittene vredeliken hebbene were gelaten unde leet aldar vor my redelike unde rechtlike , erflike unde yumbermere den ghenen, de yo kerckrad synt to Herslake , und eren nakomelingen veer pennynge unde twee scyllynge gudes geldes iarliker renthe to behoff der hilgen kercken to Herslake vorg. to wasse vor de veer pennynge unde twe scyllinge , de de ghemenen buer to Westrum plegen to ghevene in de kercken vorg. to wasse, de to hebbene und to borene iarlix unde alle iar unbekummert in und ute synen huse und erve, he nu tor tyd telet und bouwet, so dat myt syner tobehoringe belegen ys to Westrum , unde ute synen alyngen guede alleiar upp sunte Mychahele to betalene . Unde dyt hadde he ghedan vor eyne summe gudes geldes, de den vorg. Hermene wal to synen wyllen deger und al betalet ys, so se ok aldar vor my enkanden . Were ok zake , dat desse veer penuynge und twe scyllinge iarlix renthe vorg. iarlix unde alle iar nicht betalet en worden , so vorg. ys , wo dat yo to queme, so mach de, yo eyn kerckrad ys to Herslake und ere nakomelinge , dat mauen unde wynnen van allen den ghenen, de syk des vdrg. huses, erves unde alingen gudes underwyndet, telet offte bouwet, und van den vorg. vorkoperen , synen erven und anerven myt gestliken offte wertliken rechte offte myt beyden, nyn den anderen to hinderne, unvorvolget unde unvorklaget vor yemande . Vortmer so lavede Hermen vorg. aldar vor my in gerichte in guden truwen vor syk und al syne erven und anerven, des vorg. kopes unde desser vorg. iarliker renthe gude rechte stede raste erflike ewige warscop to donde unde dar ynne alle gebreck to vorvullene, also dycke , als des den kerckrade vorg. unde eren nakomelingen not unde behoff ys, vor alle deghene, de des to rechte kamen willet . Vortmere so quemen ock do zulves in dyt zulve hegede gerichte de ghemenen bur van Herslake unde enkanden, dat se eyndrechtliken vor syk und al ere erven unde auerven hadden averwyset, upp gelaten unde leten upp in aller mathe, so vorg. steyt, den kerckrade vorg. to Herslake unde eren nakomelingen eyn stucke landes veer scepels saet, belegen in Herslaker essche, ok to wasse in wedderstadinge unde vor de twe scyllinge, de de bur vorg. plegen unde aldus lange gheven hebbet der hilgen kercken vorg. to wasse, dar de hilge kercke vorg. scal van hebben unde boren iarlix unde alleiar twe scyllinge gudes geldes, dat se manen moget, als de yo kerckrad ya vorg. , in aller mathe so vorgeroret ys, unde hir mede so scolet desse beyde burscap vorg. wesen quyd ledich unde los des vorg. jarlikes was geldes to ewygen tyden, so se ok vor my in gerichte enkanden , myt zulken underschede, we yo hefft sunte Nyclaweses kampt, de scal ok hebben de veer scepels zaet landes vorg. Drogene, al argelist , nygevunde unde alle hulpereede to voren ut ghespraken . Hir ween an unde aver Eyllard de smyt to Herslake unde Ludike to Westrum , kornoten des gerichtes, Ffolck Gherd, Johan tor Busemolen, koster Busse unde ander guder lude genoch , de dat gerichte mede bestunden unde behorden . Dat dyt allent war sy, stede vast unde unvorbraken blyve, des to tughe der warheyt so hebbe ick Johan eyn zwaren richter vorg. myn ingesegel van gerichtes wegene unde umme bede willen van beyden zyden wytliken beneden an dessen breff gehangen. Datum anno Domini M CCCCO LXXI ipso die Benedicti abbatis.
Siegel: Schild mit einem Schwein. S. Johannes Merswyn.
Quelle: Hermann Wenker, Meppener Urkundenbuch, Meppen 1902 - 1906.